От святыя иконы Твоея, о Владычице Богородице, исцеления и цельбы подаются обильно с верою и любовию приходящим к ней; тако и мою немощь посети и душу мою помилуй, благая, и тело исцели, благодатию Своею, Пречистая.

Града Сионска взыскующе, под твой покров, Дево Чистая, днесь притекаем, и никтоже возможет на ны, яко несть град силен, аще не Сущаго Бога, и несть ина крепость, аще не милость Владычицы Девы.

Днесь притецем вернии к Божественному и цельбоносному образу Пресвятыя Богородицы, излиявшия капли Своих излияний и людемверным чудеса показавшия, яже мы видяще и слышаще духовно празднуем и любезно вопием: исцели наша недуги и страсти, якоже и тьмочисленнаыя каркинския (раковые) страсти исцелила еси.

Днесь светло красуется славнейший град Москва, яко зарю солнечную восприемши, Владычице, чудотворную Твою икону, к нейже ныне мы притекающе и молящеся Тебе, взываем сице: о пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианский невредимы от всех навет вражиих и спасет души наша, яко Милосерд.

Днесь, яко солнце пресветлое, возсия нам на воздусе всечестная икона Твоя, Владычице, лучами милости просвещающи, юже великая Россия, яко некий дар Божественный свыше благоговейно восприемши, прославляет Тя, Богомати, всех Владычицу, и от Тебе рождшагося Христа Бога нашего величает радостно.

Заступнице верных Преблагая и Скорая, Пречистая Богородице Дево!

Заступнице усердная, Мати Господа Вышняго!

К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

К Богородице со умилением припадем, вси, грехми обремененнии, чудотворную Ея икону Умиления облобызающе и вопиюще со слезами: Владычице, приими моление недостойных раб Твоих и подаждь нам, просящим, велию Твою милость.

Отцев все Афонское множество, соберитеся, верно празднующе, днесь радующеся и светло восклицающе вси в веселии, Божия бо Мати ныне от Ангела преславно воспевается.

Умолкает ныне всякое уныние и страх отчаяния исчезает, грешницы в скорби сердца обретают утешение и Небесною любовию озаряются светло: днесь бо Матерь Божия простирает нам спасающую руку и от пречистаго образа Соего вещает, глаголя: Аз Споручница грешных к Моему Сыну, Сей дал Мне за них руце слышати Мя выну.

Век скончается, любовь оскудевает, победу лукавый торжествует, и кто нам помощи может, аще не Ты, Дево, Чудная Мати, оградиши Крестом Сына Твоего.

Всепетая и Всеславная Царице Богородице, Мати всея твари Содетеля, христианская Надеждо и Заступнице, ненадеющимся и отчаявшимся скорое надеяние, молим Тя: милостива буди нам грешным, не остави раб Твоих и не отрини моления недостойных.

Притецем, вернии, со дерзновением к милующей Царице Богородице и умильно воззовем к Ней: низпосли на ны милости Твоя богатыя: Церковь нашу сохрани, люди во благоденствии соблюди, землю нашу избави от всякаго обстояния, мир даруй мирови и спасение душам нашим.